Йәш ҡатын ул хәҙер. Күңеле — моң

Йәш ҡатын ул хәҙер. Күңеле — моң. 
Кисә генә яңы ай тыуҙы. 
Яңы айға ниәттәрен асты,
Шомло уйҡайҙарын ул ҡыуҙы. 
Тал сыбығы түгел билкәйҙәре — 
Талсығып та тора буйҡайы. 
Буйындағы бала буҙламаһын — 
Шул тирәлә бөтөн уйҡайы. 
Йәй башында бушанырһың, тине 
Ҡулы имле кендек инәһе. 
Шифалы ла үлән төнәтмәһен 
Әҙерләне — мунса инәһе 
Килде йәш ҡатындың. Талсығыуын 
Йылы һыуҙа килде йыуаһы.
Яҙҙар етә, шөкөр. Хәҙер тауҙа 
Һөтлөгәне үҫер, йыуаһы. 
Ниндәйҙер бер ғәжәп емеш һорай 
Буйындағы йәндең эйәһе.
Әскелтем дә үҙе, татлы ғына — 
Ниндәй генә ризыҡ ейәһе?
Ниндәй генә ғәжәп емеш һуң ул?
Ниндәй тәм ул — йәшәү тәмеме?
Инәй бауырына ҡан һауҙырған — 
Тыуыр йәндең ғәме, сәмеме?
Ниндәй емеш һуң ул? Башы етмәй 
Юлайҙың да, күпме уйлап та. 
Баҙарҙарға барып урап ҡайтты,
Йөрөп ҡайтты волость буйлап та. 
Әскелтем дә үҙе, татлы ғына,
Йәшәү тәмелер ул, моғайын — 
Тыуыр бала һорай ғәжәп емеш,
Аҙнабикә ҡалған моңайып.
Өлкән көндәше лә аптыранды,
Ундай хәлдә кәңәш йәл түгел.
Аҙналы ҡарт йортон дер һелкетте 
Дәү теләге менән дәү күңел.