Өс көн, өс төн өҙгөләнде Юлай

...Өс көн, өс төн өҙгөләнде Юлай
Йәш бисәһе өнһөҙлөгөнән.
Ҡара янып сыҡҡан күҙ төптәре,
Арынып ҡуйырмы икән йөгөнән.
Ниндәй емеш уға кәрәк һуң, ти, 
Үҙе татлы, үҙе әскелтем.
Ирек тәмелер ул, йәшәү тәме,
Заң, ҡаң ғәмелер, ти, йәшле тәм...
«Өс йәшендә атҡа атланыр ул,
Биш йәшендә уҡый-яҙа белер,
Алтыһында донъя дауын аңлар,
Етеһендә ете яҡҡа елер,
Ун дүртендә яңғыҙы айыу йығыр,
Ун алтыла һылыу ҡыҙ күҙләр,
Ун етелә сәсән даны сығыр,
Ун туғыҙҙа тотош ил әйҙәр,
Егерме лә ике йәшкенәһе — 
Булғадир ҙа итер бер батша. 
Алыҫ диңгеҙ яһрҙарына мәңге
Ҡайтмаҫҡа ғына илтер бер батша. 
Хоҙай ҡаршыһында ярлыҡауҙы
Башҡорт илкәйенә ул яулар.
Батыр ирҙәр уның исеме менән 
Азат көн вә хәҡиҡәт даулар», — 
Тип әйтергә теле әйләнмәне,
Аҙнабикә белә: һәр нәмәнең 
Үҙ ваҡыты була, үҙ мәле,
Дәүеренә күрә — дәүмәле.
Ә йәненән һурылып сыҡты тауыш: 
«Салауатым! 
Балам, Салауатым! 
Изге доғам минең,
Изге антым!
Йәшә, йәшә һин,
Ирекле халҡым! 
Баҡ донъяға, тыу һин,
Салауатым!»